قبل تشري طوموبيل خصك تعرف شنو باغي من هاد الطوموبيل ، بمعنى آخر واش باغيها للسفر بزاف واش كادير شي ناڤيط طويلة ولا غي من الخدمة للدار ، واش نتا بوحدك ولا مزوج و يلا مزوج واش عندك وليدات .
غانزيد نفصل واخا غانطول شوية ؛ يلا كنتي كادير مسافات طويلة خصك تاخد سيارة مازوط لي عادة فالمغرب ثمنها أكبر نسبيا على سيارة ختها فليصانص .
علاش فهاد الحالة المازوط وماشي ليصانص؟
المازوط اسيدي كايبغي الطريق طويلة و استهلاكو كايكون أقل من ليصانص ، ولكن العيب ديال المازوط هو أن الأعطاب ديالو أكبر بكثير من ليصانص لي ناذرا ماكايطيح ولا كايخسر فيه البياس .
بالنسبة للي باغي ياخد المازوط خصو ياخد موديل طالع شوية وكيلوميطراج قليل لأن السيارة مازوط كاتاكل الدق بسرعة مقارنة بليصانص لي كاتبقا نقية وماكاتهلكش بسرعة .
فالأخير يلا كنتي كاتحرك وسط المدينة وماشي بزاف خصك تاخد ليصانص ، يلا كنتي كاتحرك بزاف وكاتسافر المازوط أفضل نقطة المازوط الإيجابية الوحيدة هي الإستهلاك أقل و ثمنه أرخص.
ليصانص النقط الإيجابية ديالو هو كايبقا الحديد نقي ماكايطيح بزاف فأعطاب ، الطوموبيل ماكاتحتاجش تحركها يوميا بحال المازوط لي كايحتاج يتحرك باستمرار ، يعني يلا خليتي الطوموبيل ايصانص 15 اليوم ولا كتر غاتجي ديماريها عادي .
نقطة اخرى ماتشريش عند السمسار واخا يعطيهالك فابور ، فاش تبغي تشري دي معاك شي ميكانيك صاحبك ولا صاحب صاحبك ولا ولا ولا ... + طولوري باش تعرف واش الطوموبيل دايرة شي كسيدة خايبة .
نفترضو شريتي طوموبيل خصك دير لاڤيزيت عند شي واحد مايديكش عندو داك لي شريتي عندو ، وماتعطيه الفلوس حتى دير دياگنوستيك لأنه هو الوحيد لي قادر يكشف المشاكل لي فالسيارة .
* تنبيه !
- سوف يتم نشر تعليقكم بعد مراجعته
- التعاليق التي تحتوي على كلمات نابية و أرقام الهواتف أو نشر روابط أو إشهار لجهة ما لن يتم نشرها.
- يرجى الكتابة بالحروف العربية أو اللاتينية.