ناس لي مازال ماعارفينش شنو هي anapec و شنو هي Contrat anapec؟هادشي لي غادي تقراه لتحت را مهــم ، داكشي علاش خاصكم تعطيوني شي دقايق من وقتكم خفا زربا,قراوه غادي ينفعكم آجلا أم عاجلاٌ و بغيتكم قبل ماتقراوه طاكيو صحابكم باش يبان للناس اخرين و يستافدو.
عقد أنابيك Contrat Anapec :
كتقلب على خدمة أو جاك عرض عمل وهو بعقد أنابيك و معرفتي مادير!! و خايف ماتسنيش؟ عندك تخوف تقبل أو ترفض و تندم من بعد؟ الحل ساهل خويا ولا ختي تبع معايا هادشي لي جاي مزيان و ركز معايا لاحقاش القانون لا يحمي المغفلين. عرف حقك و عرف واجباتك و ماتخافش.
أولا شكون هيا هاد أنابيك
- أنابيك (الوكالة الوطنية لإنعاش الشغل و الكفاءات):
هي مؤسسة عمومية عندها الإسقلالية المالية و المعنوية، وهي تحت الوصاية ديال وزارة الشغل، و جميع الخدمات ديالها مجانية و كنسطر عليها مزيااااان "جميع الخدمات ديالها فااابور" و تبع معايا مزيان النشاط ديالها كيتفرق على 3 المحاور كبرى:
1- الوساطة فسوق الشغل بين المشغلين و الباحثين عن العمل لي هو نتا.
و هادا سميتو برنامج إدماج contrat insertion ou contrat ANAPEC سميوه لي بغيتو، دبا علاش دار هاد كونترا أنابيك علاش مايكونش كونترا عادية (CDD/CDI) حيت هاد لي كونترا عادي ماكيزعموش عليهم الشركات و ماكيبغيوش إخدمو شباب لي ماعندهمش خبرة بهاد نوع ديال كونطرا حيث ببساطة فيها مجموعة من الإلتزامات و التكاليف للمشغل و كيدير بناقص وكيجيب سطاجير إحرث بيه.
و باش الدولة توضع حد لهادشي خرجو مفهوم جديد سميتو عقد إدماج لي هو عبارة عن سطاج أيه سطاج مع وعد بالعمل و لكن ماشي بالضرورة ملي تسالي تخدم! غي بلاتي متزربش و تبع معايا مزيان.
هاد عقد أنابيك فيه مجموعة من المميزات للمشغل و للباحث عن العمل، بالنسبة للمشغل مكيخلصش الإقتطاعات ديال cnss و ديال TFP بالنسبة للباحث عن العمل مكيخلصش الضريبة على الدخل IR و كيستافد من التغطية الصحية الإجبارية AMO.
غاتقوليا علاش مايستافدش من cnss أو التقاعد؟ مزيان، رجع لشنو قلت فاللول نتا لحد الآن غي سطاجيير خاصك تكون واعي بهادشي و المشغل قلنا مكيخلصش عليك cnss و نتا كذلك فكيفاش بغيي تستافد منها و نتا مخلصتيهاش و أصلا الصندوق حريرتو حريرا و غير خليو داك الجمل راكد.
المهم ملي غاتمشي تسني كونترا خاصك بطبيعة الحال تقراها مزيان و الحاجة لي مفهمتيهاش سول عليها من حقك و مافيهاش عيب و خصك تعرف بلي ممكن تستاقل أو ممكن إجري عليك المشغل فأي وقت و هادشي خاص إقولها ليك فلول نهار السينياتير، عندك الحق تستافد من كونترا أنابيك الا مافاتش 6 شهور.
نعطيك مثال الا خدمتي بعقد أنابيك و دازت شهر أو شهرين أو حتى خمس أشهر و خرجتي أو خرجوك فعندك الحق تستافد من عقد أنابيك أخور إلا جاب الله لقيتي خدمة بكونترا أنابيك.
أما إلا فتي 6 شهور د الخدمة و خرجتي فمعمرك باقي غاتستافد من كونطرا أنابيك حيت لسبب بسيط الدولة غاتعطيك زوج فرص باش تستافد من عقد أنابيك لي فيهم المميزات لي قلنا فلول و مغاتبقاش ديما تخلص عليك الضريبة و على المشغل الإقتطاعات.
ونتا تبقا تبدل من خدمة لخدمة و ديما بعقد أنابيك و هادشي فيه ردع للمشغلين باش مايبقاوش إدخلو و يخرجو ناس و يستغلو المميزات د العقد (قلنا متيخلصش الضمان الاجتماعي و الضريية على التكوين المهني) و خاصك تعرف أن المشغل حتى هو إلا مالتزامش إخدم 60% من ناس لي دار ليهم كونطرا أنابيك فراه معمرو غايستافد مرة اخرى من هاد المميزات.
مثلا إلا شي شركة خدمات 10 ناس بسطاج / كنطرا أنابيك فكيلزمها تخدم بعقد (CDD/CDI) على الأقل 6 اذن، تايبقى الحل هو تفرض راسك تكون مابين دوك 6 و تبين على حنت يديك.
و خاصك تعرف كذلك أن عقد اناييك أقل حاجة فيه هو 1600 درهم و أكثر حاجة هو 6000 درهم و أقصى مدة هو 24 شهر أي عامين كتسالي كونطرا تلقائيا، إما كتفارقو إما كيحولها لكونطرا عادية حلالا طيبا و نتا سطاجير خاصك تفرض راسك باش ترسم معاهم إن شاء الله.
و دبا مني عرفتي هادشي كامل و عرفتي لي عليك و لي من حقك فأنت غاتعرف واش تسني كونطرا أنابيك ولا لا و إلا بغيي رأي ديالي غي سني أحنيني ولا أحنينتي و توكل على الله وإن شاء الله يكون خير .. مدبرها حكيم.
2- التكوين وإعداد يد عاملة كفأة كتناسب لمتطلبات سوق الشغل
كدير دورات تكوينية على حساب دراسة كديرها كتبين لها كل جهة فالمغرب أشمن نوع د الخدمة مطلوب فيها أولا الشركات فديك البلاصة أشمن خصاص عندهم و عليها كيلونصيو دورات تكوينية باش الشباب إتكونو وإكون عندهم دبلوم فداك التخصص و إقدر يخدم هادشي فابور ولكن ماشي غايخدموك من بعد الدورة التكوينية لا فيق معايا هما كيتنبأو فقط.
نعطيك مثال (فجهة الدار البيضاء مثلا الدراسة عطات ليهم بلي كاين خصاص فعمال مجال الفندقة فهما كيلونصيو دورة تكوينية للشباب لي بغاو هاد المجال على أساس إكون عندو دبلوم و ملي تجي شي شركة تتقلب على هادشي كيعيطو ليك) هادي سميتها formation qualifiante de reconversion
3- توجيه و مرافقة حاملين المشاريع أو auto-emploi
عندك مشروع باغي تبداه معارفش ولا غرام على كيفاش تأسس شركة أو أشمن نوع د الشركات أو الوراق لي خاصك المهم كلشي كتمشي لأي agence أنابيك قريبة ليك كتاخد معاهم موعد و كتكمل معاهم و فيها بزاف د الحوايج اعاونوك فيها و يوجهوك حتى باش تلقى التمويل عند جهات مختصة كالمبادرة الوطنية للتنمية البشرية إلى غير ذلك. و شخصيا كنصحكوم تاجهو لهاد الإتجاه دير مشروع ديالك وخا يكون بسيط و هما غادي إعاونوك.
مهم، هادشي بخلاصة خفَن زربن، أهم الأدوار ديال أناييك، نتمنى تكونو ستافدتو و سولو على هادشي لي قلت ليكم و تأكدو منو راه أي agence anapec مشيتي ليها سولهم غايشرحو ليك كولشي تحركو ترزقو و ماتنساوش تبارطجيو تنفعو غيركم الله يرحم الواليدين.
في الأخير كان نتمناو أنكم فهمتو كل ما يتعلق بوكالة أنابيك و عقود عمل ديولها و ما تنساوش تشاركو المقالة علا صفحتكم لتعم الفائدة وشكرا لكم تحيات موقع جوبي ماروك.
* تنبيه !
- سوف يتم نشر تعليقكم بعد مراجعته
- التعاليق التي تحتوي على كلمات نابية و أرقام الهواتف أو نشر روابط أو إشهار لجهة ما لن يتم نشرها.
- يرجى الكتابة بالحروف العربية أو اللاتينية.